པ་རཱག་གི་དཔྱིད་རྒོལ།
“ད་ལན་དཔྱིད་ཀར་དམག་འཁྲུག་དེ་མཇུག་གྲུབ་ཟིན་པས། ང་ཚོར་སླར་ཡང་གོ་སྐབས་བཟང་པོ་ཞིག་སྩལ་བྱུང་། ད་ཐེངས་སླར་ཡང་ང་ཚོ་ལ་སྤྱི་པའི་རྩ་དོན་དེའི་ཆེད་དུ་རང་རང་གི་ལག་པ་བསྲིང་རྒྱུའི་གོ་སྐབས་ཐོབ་པ་རེད་ལ། ལས་དོན་དེ་ཉིད་དོན་དུ་གཉེར་བ་ནི་ང་ཚོས་སྤྱི་ཚོགས་རིང་ལུགས་ཞེས་བརྗོད་བཞིན། ང་ཚོའི་འདས་པའི་མཚན་སྙན་དང་རང་ཉིད་ལ་ཡོད་པའི་བསམ་འཆར་ལེགས་པོ་རྣམས་ཀྱིས་དེ་ཉིད་རྣམ་པ་བཟང་པོ་ཞིག་བསྐྲུན་བཞིན་ཡོད། དཔྱིད་ཀ་རྫོགས་ཟིན་པས་བསྐྱར་དུ་ཕྱིར་གཏན་ནས་ལོག་མི་སྲིད། དགུན་ཁ་སླེབས་དུས་ང་ཚོས་གཞི་ནས་རྟོགས་ངེས། ངལ་རྩོལ་བ་དང། ཞིང་པ། ལས་སྣེ་བ། སྒྱུར་རྩལ་པ། མཁས་དབང་། ཚན་རིག་པ། འཕྲུལ་ལས་པ། གཞན་ཡང་རྣམ་པ་ཚང་མར་ཞུ་རྒྱུར། ང་ཚོའི་བསྒྲགས་གཏམ་མཇུག་སྒྲིལ་བ་ཡིན། འདི་ནི་ཚན་རིག་པ་དང་མཁས་དབང་རྣམས་པའི་རེ་བ་བཏོན་པ་ལྟར་བྲིས་པ་ལགས་སོ།།”
༩༦༨ ཟླ་བ་༦ ཚེས་ ༢༧ ཉིན་ཡིག་འབྲུ་ཉིས་སྟོང་ཅན་གྱི་བསྒྲགས་གཏམ་གྱི་དུམ་ཚན་མཐའ་མ་ལས་བཏོན་པའོ།
སྤྱི་ལོ་༡༩༦༠ རེ་གྲངས་ཀྱི་འགོ་སྟོད་ནས་ཅེག་སི་ལོ་ཝ་ཀི་ཡ་(Czechoslovakia)ནང་ཆབ་སྲིད་ཀྱི་གནས་སྟངས་དེ་རིམ་བཞིན་གུ་ཡངས་སུ་སོང་། སྤྱི་ལོ་༡༩༦༠ ལོ་དང་། ༡༩༦༢། ༡༩༦༥ བཅས་ཀྱི་ལྔ་པའི་ཉེས་ཅན་གུ་ཡངས་སྐབས་སུ་ཆབ་སྲིད་བཙོན་པ་ཕལ་ཆེ་བ་ཀློད་གྲོལ་བཏང་ཡོད་ལ། ད་དུང་གལ་གནད་ཆེ་བའི་རིག་གཞུང་སླར་གསོ་བྱུང་ཞིང་། དེའི་ངོ་མཚར་ཆེ་ཤོས་ཀྱི་རྟགས་མཚན་གྱི་དཔེར་མཚོན་དེ་ནི་ཅེག་སི་ལོ་ཝ་ཀི་ཡའི་རླབས་གསར་(Czechoslovak NewWave)ཞེས་པའི་འཛམ་གླིང་ནང་གྲགས་ཅན་གློག་བརྙན་དེ་ཡིན། ཤེས་རིག་བསྟི་གནས་ཁང་རྣམས་ལ་དཔལ་འབྱོར་ཉམས་རྒུད་ཀྱི་དཀའ་རྙོག་སེལ་ཕྱིར་ལེགས་བཅོས་འཆར་འགོད་བྱས་ཡོད།
མང་ཚོགས་ཆབ་སྲིད་ཁྲིམས་སའི་ཞིབ་དཔྱོད་ཀྱི་དུས་སྐབས་དེར་ཨེན་ཊོ་ཡིཎ་ནོ་བོཊ་ནི་(Antonin Novotny)རྩེ་མོར་སོན་ཡོད་ཅིང་། ཁོང་དམར་ཕྱོགས་ཚོཊ་པའི་དབུས་ལྷན་ཁང་གི་དྲུང་ཆེ་ཐོག་མ་དང་ཚོགས་གཙོ་གཅིག་ལྕོགས་ཡིན།དུས་སྐབས་དེ་ཡི་ཆབ་སྲིད་གནས་སྟངས་ནི་གུ་ཡངས་དང་དམ་དྲག་གཉིས་རེས་མོས་བྱེད་ནས་བསྡད་ཡོད།
དེ་རྗེས་རིམ་པས་ཁོང་གི་ཁ་གཏད་ལ་ནང་ཁུལ་འགའ་ཟླའི་ཤོག་ཁག་ཅིག་བྱུང་ནས། སྤྱི་ལོ་ ༡༩༦༨ ཟླ་བ་༡ ནང་ཁོང་ལ་ཚོགས་པ་དེའི་འགོ་ཁྲིད་ལས་ཕྱིར་འཐེན་བྱེད་དགོས་པའི་བཙན་བཀའ་ཕབ། ནོ་བོཊ་ནི་(Novotný)ཕམ་ཉེས་ཤོར་དོན་ནི། དཔལ་འབྱོར་གྱི་དཀའ་རྙོག་སི་ལོ་ཝ་ཀི་ཡི་(Slovak issue)གནས་དོན་ནམ། གཙུག་ལག་སློབ་ཁང་གི་སློབ་གཉེར་བ་ལྟ་བུའི་ཚོགས་སྡེ་ཁག་ཅིག་དང་འགལ་ཟླ་བྱུང་བ་སོགས་རྒྱུ་རྐྱེན་སྣ་ཚོགས་ཡོད་པ་རེད། དེ་རྗེས་ཨེ་ལེཀ་ཛེན་ཌར་དུབ་ཅེཀ་(Alexander Dubček)དམར་ཤོག་ཚོཊ་པ་དེའི་དབུ་ཁྲིད་ལ་བདམས་པ་རེད།
ཁོང་གིས་དུས་ཡུན་ཟླ་བ་བརྒྱད་རིང་ལ། མང་གཙོར་བཅོས་སྒྱུར་གྱི་ནུས་ཤུགས་བཏོན་ནས་ ༡༩༦༨ ཟླ་བ་༣ ཟླ་མཇུག་ཏུ་བཙན་གནོན་ཞིབ་བཤེར་མེད་པར་བཟོས་པས། གསར་འགོད་པ་ཚོས་དེ་སྔོན་བཀག་རྒྱ་ཡོད་པའི་གནད་དོན་རྣམས་ཀྱི་ཐོག་ལ་སྦ་གསང་མེད་པར་གླེང་སློང་བྱས། དེ་ཡང་ཨེན་ཏོ་ནི་ནོ་ཝོཏ་ནི་(Antonín Novotný)ལ་བཙན་ཤོད་ཀྱིས་ཚོགས་གཙོའི་གོ་གནས་ནས་ཕྱིར་འཐེན་བྱེད་བཅུག་ནས། ལུ་བིཀ་སུ་བོ་བྷོ་ཌ་(Ludvik Svoboda)ཞེས་པའི་བཅོས་བསྒྱུར་རྒྱབ་སྐྱོར་བ་དེ་ཁོང་གི་ཚབ་ཏུ་བསྐོས་པའི་རྒྱུ་མཚན་གཅིག་ཡིན། གཞུང་གི་གོ་གནས་གཞན་དག་ཀྱང་རིམ་པས་བཅོས་སྒྱུར་རྒྱབ་སྐྱོར་བའི་ཆབ་སྲིད་པ་ཚོས་དབང་བསྒྱུར་བ་རེད།